శరన్నవరాత్రి శుభాకాంక్షలు

ఆశ్వీయుజ శుద్ధ పాడ్యమి నుంచి శుద్ధ నవమి వరకూ తొమ్మిది రోజులను నవరాత్రులు అంటారు. అమ్మవారి ఆరాధనా మహోత్సవాన్ని ‘శరన్నవరాత్రి ఉత్సవాలు’గా, ‘దేవీనవరాత్రులు’గా పిలుస్తుంటారు. ఆశ్వయుజ శుద్ధ పాడ్యమి మొదలు శుద్ధ నవమి వరకూ తొమ్మిది రోజులను దేవీ నవరాత్రులు దశమిని దసరా అని వ్యవహరిస్తారు. దస్ అనగా పది, హరా అనగా పండుగ కావున దీనిని దసరాగా పిలుస్తారుమహాశక్తి స్వరూపిణి అయిన అమ్మవారిని ఈ తొమ్మిదిరోజుల పాటు తొమ్మిది రూపాలలో అలంకరించి పూజించడం జరుగుతుంటుంది. ఈ నవరాత్రుల లో దుర్గమ్మ ని తొమ్మిది విధాలుగా అంటే బాలాత్రిపుర సుందరి, మహాలక్ష్మి, గాయత్రి, అన్నపూర్ణ, సరస్వతి, శ్రీలతా త్రిపురసుందరి, దుర్గ, మహిషాసురమర్థిని, రాజరాజేశ్వరిగా భావించి విభిన్నమైన అలంకారాలతో అర్చిస్తారు. పదవ రోజు విజయదశమి కలసి దసరా అంటారు. దసరా పండుగ విజయదశమి నాడు జరుపుకోవడం జరుగుతుంది. తెలుగు వారు దసరాని పది రోజులు జరుపుకుంటారు. ముందు నవరాత్రులు దుర్గ పూజ ఉంటుంది.
నవరాత్రి పూజను తొమ్మిది రోజులపాటు చేయాలి. నవరాత్ర వ్రతం ద్వారా తనను ఆరాధించిన వారిని దుర్గాదేవి అనుగ్రహిస్తుంది. నారద పాంచరాత్ర గ్రంథంలో నవ అనే శబ్దానికి పరమేశ్వరుడని, రాత్రి శబ్దానికి పరమేశ్వరి అనీ అర్థాలు ఉన్నాయి. ఈ ప్రకారం చూస్తే పార్వతీ పరమేశ్వరుల ఆరాధనమే నవరాత్ర వ్రతం.

నవరాత్రి ఉత్సవాల్లో అందరినీ సమ్మోహితులను చేసే అంశం – అమ్మవారి అలంకారాలు. రాక్షస సంహార క్రమంలో దుర్గాదేవి ధరించిన రూపాలకు ప్రతిగా రోజుకు ఒక అలంకారం చొప్పున నవరాత్రులు జరిగే రోజుల్లో అమ్మవారిని ప్రత్యేకంగా అలంకరిస్తారు. అసుర సంహారంచేసి సాధించిన విజయానికి చిహ్నంగా పదో రోజున విజయదశమి పర్వదినాన్ని జరుపుకుంటారు. మధుకైటభాది రాక్షస సంహారం కోసం అమ్మ ధరించిన ఈ రూపాలనే ‘నవదుర్గా’ రూపాలుగా దేవీ, మార్కండేయ, భవిష్య పురాణాలు చెబుతున్నాయి. దేవీ భాగవతం ప్రకారం శైలపుత్రి, బ్రహ్మచారిణి, చంద్రఘంట, స్కందమాత, కాత్యాయని, కాళరాత్రి, మహాగౌరి, సిద్ధిద అనేవి నవదుర్గా రూపాలు. ప్రతి అవతారానికి ఓ ప్రత్యేక ఆధ్యాత్మిక, ఉపాసనా రహస్యాలు ఉన్నాయి.బెజవాడ కనకదుర్గమ్మ ఆలయం లో జరిగే అలంకార వైభవాన్ని ప్రతి రోజు, ఈ పది రోజులు గుర్తు చేసుకుందాం.

ప్రథమం శైలపుత్రీచ| ద్వితీయా బ్రహ్మచారిణీ|
తృతీయా చంద్రఘంటేతి| కూష్మాండేతి చతుర్థకీ|
పంచమా స్కందమాతేతి| షష్ఠా కాత్యాయనీతి చ|
సప్తమా కాలరాత్రే చ| అష్టమాచాతి భైరవీ|
నవమా సర్వసిద్ధిశ్చాత్| నవదుర్గా ప్రకీర్తితా:||

నవరాత్రులు- అంటే ‘నవ’- నూతనమైనదీ, కొత్తదీ అనీ, ‘రాత్రి’-అంటే జ్ఞానమూ అనీ అర్థం. నూతన జ్ఞానాన్ని ప్రసాదించే రోజులే నవరాత్రులు. వాటిని ప్రసాదించే తల్లియే దుర్గాదేవి. ఆమెనే ఆదిపరాశక్తి. సరస్వతి, లక్ష్మీదేవి. అందుకే మిగతా పండుగల్లో లాగా కాకుండా దసరా వేడుకల్లో ఒక్కోరోజు ఆ శక్తిని ఒక్కో రూపంలో ధ్యానించి, పూజించి, ఆమె కృపకు పాత్రులు కావాలి.
ఒక కథ ప్రకారం పార్వతీదేవికి పది అవతారాలనీ, ఒక్కో అవతారంలో దేవి ఒక్కో రాక్షసుణ్ణి చంపి భక్తులను కాపాడిందనీ అంటారు. మార్కండేయ పురాణంలో దేవీ మహాత్మ్య ఘట్టంలో ఈ విషయాల కథనాలున్నాయి. మధుకైటభులనే రాక్షసులు మానవాళికి కంటకప్రాయులుగా మారారట.
వాళ్ళను మహావిష్ణువు సైతం చంప ప్రయత్నించి విఫలం కావడంతో ‘మాయ’కులోనై చివరికి విష్ణువు కోర్కెమేరకు వారిరువురూ చనిపోయారు. ఇదీ మరో కథనం.ఆ మాయయే మాయాదేవి. పది తలలు కల్గినదిగా ‘మహాకాళి’గా ఆమెను పిలుస్తారు. కొలుస్తారు. ఇక రెండో అవతారంలో మహిషాసురుని చంపి, మహిషాసుర మర్దినిగా పేరుపొందింది. సింహ వాహనయై మహిషాసురుని చంపిన మహాశక్తి మూడవ అవతారంలో శుంభు నిశుంభులను సంహరించింది. నాలుగో అవతారంలో ఈమె నందునికి పుత్రికగా జన్మించి, కంసుడికి హెచ్చరిక చేసి అదృశ్యమైపోయింది. ఐదో అవతారంలో దేవి ఒక రాక్షసిని తన దంతముతో చీల్చినందువల్ల ఆమె రక్తదంతిగా పేరుపొందింది.అనేక సంవత్సరాలు లోకమంతా క్షామంతో అల్లాడిపోగా, ఆరవ అవతారంలో సస్యశ్యామలయై రక్షించింది. అందుకే ఆ అవతారంలో ఆమె శాకాంబరిగా పేరుపొందింది. దుర్గుడనే దుర్జనుడైన రాక్షసుని చంపి, తన 7వ అవతారానికి ‘దుర్గ’గా పేరుపొందింది.
ఎనిమిదవ అవతారానికి మాతంగిగా, తొమ్మిదవ అవతారానికి ‘లభ్రమారి’గా పేరుపొందింది శక్తి. నవరాత్రులలో సాధారణంగా దేవీభక్తులు ఉపవాస వ్రతాలు చేస్తారు.

భక్తులు ఈ తొమ్మిదిరోజుల పాటు దీక్ష చేపట్టి, ఏకభుక్త వ్రతాన్ని ఆచరిస్తూ అమ్మవారిని పూజిస్తే అనుకున్న కార్యాలు దిగ్విజయంగా పూర్తవుతాయి. శరన్నవరాత్రులలో అత్యంత భక్తిశ్రద్ధలతో ఎవరైతే తనని పూజిస్తారో, వాళ్లు తనకి అత్యంత ప్రీతిపాత్రులని అమ్మవారే స్వయంగా చెప్పినట్టుగా పురాణాలు వెల్లడిస్తున్నాయి. కొందరు జంతుబలులు చేసేవారు కూడా. కానీ, ఇక్కడ గమనించాల్సిన విషయం ఒక్కటుంది. మనలో జంతువులు, కొన్ని అతి క్రూర జంతువులున్నాయి. అవే కామ, క్రోధ, మోహ, మద, మాత్సర్యాలు. ఆదిశక్తి బలికోరేది ఈ క్రూర జంతువులనే. అంతేకానీ, నోరూవారుూ లేని, అమాయకపు జంతువులైన మేకలూ, గొర్రెలూ, పొటేళ్ళూ కావు. దీనిని అందరూ గుర్తించి నడుచుకోవడమే ‘విజయదశమి.’

విజయానికి నాంది ఈ దశమి
నవరాత్రులలో అమ్మవారిని ఆరాధించి శక్తి పుంజుకున్న మానవుడు విజయం కోసం ఉవ్విళ్లూరడం సహజం. ఎందుకంటే దసరా పండుగ అందరికీ విజయాలను చేకూర్చే పండుగ. ఎందరో రాజులు విజయ దశమిని విజయప్రాప్తి దినంగా ఎన్నుకున్నట్లు చరిత్ర చెబుతోంది శ్రీరాముని పాలనాకాలం నుంచే విజయదశమిని విజయ ప్రస్థానంగా పరిగణించారు. శ్రీ రాముడు ఈ రోజే రావణుడిపై దండెత్తి వెళ్లాడు. ఛత్రపతి శివాజీ మొగలాయి రాజు ఔరంగజేబును ఎదుర్కొనడానికి విజయదశమినే ముహూర్తంగా ఎంచుకుని, అదేరోజున యుద్ధం చేసి, అఖండ విజయం సాధించాడు.

విజయదశమి అంటే సకల విజయాలనూ కలుగ చేసే దశమి. ఆ రోజున ఆరంభించే ఏ పని, వృత్తి, వ్యాపారం అయినా అఖండ విజయం సాధిస్తుందని పురాణాలు చెబుతున్నాయి. కాబట్టి ఈ పర్వదినాన్ని ముహూర్తంగా ఎంచుకుని మంచి పనులు ప్రారంభిద్దాం! ఈ విజయదశమి అందరికీ అన్ని రంగాలలోనూ విజయాలను చేకూర్చాలని ఆదిపరాశక్తిని ప్రార్థిద్దాం!

Poltical News

News

క్రీడలు

యువత

Hyderabad Metro Rail

చర్చలు

శరన్నవరాత్రి శుభాకాంక్షలు

Submit a Comment Cancel reply

PM Tweets

Short Films

Recent Posts

World News

Life Style

Polls

Health

Talent